【優質文字專欄】FANCARE@日本見：令和七年之日本見

今日能以「日本見JapanMiru」小腳色登場《WILDCARD》，追本溯源，同朴氏主編都有啲淵源。畢業第一份工，就在潮流雜誌創刊號跟朴氏編輯寫娛樂電影音樂，時為Y2K水尾，個人成就試過訪問岩井俊二、Alicia Keys同白靈姐姐！小記返工唔夠3個月就被派去東京出差，人生第一個work trip，睇仍然係鮮肉嘅NEWS同w-inds.（太耐了記憶混沌有待FC），結果寫寫下外娛寫埋旅遊，月月飛日本出trip，開啟之後no regret嘅旅遊記者生涯。

回帶完畢，今日正值令和7年大晦日，亦都係成為slasher第7年，未癢，亦冇以前咁身痕密密飛日本，第一回寫字，不如寫今年日本見識到嘅cultural shock！

今年赴日共4次，3次工幹1次旅行，3次搭CX 1次 PEACH，3次東京1次大阪；年頭一次坐CX 最新B仔客艙Aria Suite，可以閂埋門嘅私人空間算追返落後，但座位設計真係正嘅，可以在熒幕上幫朕check下廁所有冇人嘅貼心細節，堪稱日本級Omotenashi！同行首次參觀日本Costco，雖然見唔到台灣網民成日講嘅特賣Rimowa（被LVMH收購之後邊可能仲有？），但你以為Costco只係買凍肉同大包薯片？日本人去Costco可以買到Starlink衛星網絡接收器喇！香港用唔到ChatGPT之餘仲可以有幾井底？

2月旅行嗰轉去了富士山+長野，2月濃冬被逼要租雪胎車但竟然無積雪，自駕去完幾鍾意松本、安晏野嘅恬靜，印象最深刻係發掘咗原本無plan去嘅訪諏一間古物店；去松本，目的是住松本十帖，《自遊人》團隊經營的旅館，將舊浴場改建成圖書館，歡迎打卡同刨雜誌，其他方面，溫泉同飲食方面雖則未至於無得彈，但團隊將老化嘅溫泉街活化，舒服得來保持quiet，有返溫泉小街感覺，期待去埋十帖其他設施。

錯過咗2005年愛知萬博同2021年COVID下的東京奧運，作為寫日本旅遊的人，今年8月，拜訪了日本年度盛事——大阪萬博——在39度猛暑之下。背負著1970年萬博歷史，沒有岡本太郞的太陽之塔以及那個年代革新時代的科幻展品，單靠建築師藤本壯介設計的大屋根，在木造建築圓環俯瞰「世界」，已經夠有視野。當地球村各國已經沒甚鮮為人知新事之時，日本人大刀闊斧將萬博變成迪士尼樂園一樣，有年票、有搶fast pass入館玩法、有mascot脈脈、仲有大量限定crossover商品，集國家印章不只用簿仔仲可以mint偽NFT，埋單大賺370億日元，事前不被睇好嘅日本萬博又贏一仗！

以上為令和7年．2025年之僕見。今後，呢度會猶如安藤忠雄的青蘋果一樣保持青澀，見識井底世外。令和8年，祝大家繼續5算去日本見！

初めまして、よろしくお願いします。多多指教。